Жемқорлықсыз қоғам – сенімді жол

Жоғары буын оқушылары арасында «Жемқорлықсыз қоғам – сенімді жол» тақырыбында тәрбие сағаты өтті.
Іс-шараның негізгі мақсаты – оқушыларға сыбайлас жемқорлықтың қоғам дамуына тигізетін кері әсерін түсіндіру, адалдық, әділдік, жауапкершілік және заңға құрмет сияқты құндылықтарды қалыптастыру, сондай-ақ жас ұрпақтың жемқорлыққа қарсы көзқарасын нығайту.
Тәрбие сағаты барысында оқушылар сыбайлас жемқорлық ұғымы, оның пайда болу себептері мен қоғамға келтіретін зияны туралы ой бөлісті. Адал еңбек пен әділдіктің адам өміріндегі және қоғам дамуындағы маңызы талқыланды.
Оқушылар екі топқа бөлініп, «Жақтаушылар» және «Даттаушылар» ретінде пікірталасқа қатысты. Топтар өз көзқарастарын дәлелдермен негіздеп, сыбайлас жемқорлықтың алдын алу, қоғамдағы адалдық қағидаларын сақтау және әр азаматтың жауапкершілігі туралы өз ойларын ортаға салды. Пікірталас барысында оқушылар бір-бірінің пікірін тыңдап, өз ұстанымдарын еркін жеткізуге мүмкіндік алды.
Сонымен қатар, оқушыларға жемқорлыққа бейжай қарамау, кез келген жағдайда адалдықты басты қағида ретінде ұстану және заң талаптарын құрметтеу қажеттігі түсіндірілді.
Іс-шара соңында оқушылар «Әрбір жас – ел болашағы» екенін сезініп, жемқорлықсыз қоғам құруға өз үлестерін қосу маңызды екенін атап өтті. Адалдық пен әділдік – жарқын болашақтың берік негізі екені айтылды.
Жемқорлықсыз қоғам – әрқайсымыздың адал таңдауымыздан басталады!